Actu politicu n'Asturies

Testu del comite de sofitu a I.I. n'Asturies

Iniciativa Internacionalista-Solidaridá ente los Pueblos (II-SP) ye dalgo más qu’una candidatura electoral, ye tamién un frente común de llucha ente delles de fuerces independentistes d’izquierdes de los diferentes pueblos que güei faen parte del Estáu español, y fuerces de la izquierda verdadera d’ámbitu estatal; poro, la nuestra xera nun acaba’l 7 de xunu, pela cueta, más bien entama una nueva llinia de trabayu en comuña baxo los principios de solidaridá, non intromisión nos asuntos d’otros pueblos y l’internacionalismu, presupuestos dende los que vamos lluchar por llevantar una nueva barricada común que puea ayudar y acompañar a les lluches de lliberación nacional y/o les de les clases sociales esplotaes.

Arriendes de lo asocedío nos postreros díes cuando se desendolcó una campaña mediática, xudicial y política cola fin d’anular la candidatura d’II-SP presentamos equí una retafila de considerances:

-Sorrayamos el calter non democráticu del Estáu español onde nun se cumplen unos criterios mínimos pa poder falar d’un Estáu democráticu sensu stricto por mor, d’ente más otros, de los elementos qu’indicamos de siguío:

1)Llexitimación del so orixe: una monarquía afitada y diseñada por Franco.

2)Desapaición na práctica de la separtación de poderes: el casu postreru ye lo qu’asocedió con esta candidatura.

3)Llibertaes fundamentales: pieslle de periódicos y otros medios de comunicación, illegalización d’organizaciones polítiques y sindicales, etc.

4)Presencia de presos políticos.

5)Inseguridá xurídica.

6)Inesistencia d’igualdá de los ciudadanos y ciudadanes énte la Llei.

7)Calter represivu de les fuerces de l’orde públicu.

-De la mesma refugamos la Europa del Capital, fecha a espaldes de los y les trabayadores mesmo que de los pueblos que lluchen pola so lliberación.

A lo último y dende estes reflexones esponemos les exes básiques nes que s’apoya la candidatura d’Iniciativa Internacioanlista-Solidaridá ente los Pueblos:

-Xusticia social: que la crisis la paguen los que la provocaron, ello ye, los capitalistes. La xente qu’apoyamos esta candidatura garramos el compromisu de puxar pola movilización pa parar nesti momentu lo agresivo d’esti sistema capitalista, ensin medrana nenguna a proponer y desarrollar con esi envís midíes anticapitalistes que tengan la fin única y última de garantizar los derechos y intereses de los trabayadores.

-Llibertaes Democrátiques dafechu: Derechu a la non discriminación por razones ideolóxiques, de llingua y cultura, d’edá o de xéneru. El derechu a la llibre espresión, a nun ser represaliáu, torturáu o procesáu poles idees propies, a votar y a ser votáu, derechu a la soberanía de los distintos pueblos esistentes baxo la xurisdicción del Estáu español.

-Non a la discriminación de xéneru: esixencia normativa, xurídica y práctica que faiga posible’l fin de la discriminación. Derechu y posibilidá verdadera de control de les muyeres del so cuerpu, la so sexualidá y la so capacidá reproductiva.

-Derechos políticos: Reivindicamos los derechos negaos pol réxime actual, ente los qu’hai que sorrayar el derechu de tolos pueblos a decidir de manera soberana’l so futuru, y non como un fechu aislláu, sinón permanente, ello ye, reconocimientu y aplicación del derechu d’autodeterminación.

-Contra la Europa del capital: Tamos a la contra de la Europa del capital y al favor de la Europa de los pueblos. Tamos a la contra de la OTAN en cuantes qu’espresión militar d’un conxuntu de poderes que busquen la hexemonía y el control del planeta, y coles mesmes tamién esiximos la retirada del Estáu español d’esta alianza militar. Tamos contra la especulación y l’esbarrumbe del mediu ambiente. Tamos pola defensa de la soberanía alimentaria y de lo comunal énte lo privao.

Asina les coses, facemos un brinde al conxuntu de trabayadores asturianes y asturianos pa qu’apoyen y voten a Iniciativa Internacionalista-Solidaridá ente los Pueblos (II-SP) nes próximes elecciones al Parlamentu Européu, siendo sabedores que la llucha y el camín de les persones y colectivos qu’apoyamos esta candidatura nin se reduz a esta convocatoria electoral nin va limitase al campu institucional.

RUEDA DE PRENSA ESCONTRA LA LLEI DE PARTÍOS Y PRESENTACIÓN DEL COMITE DE SOFITU A I.I. N'ASTURIES

Ayeri 27 de Mayu convocose nos locales de la Casa Sindical de Xixón una rueda de prensa pa denunciar la llei de partíos. Cola presencia de dellos coleutivos como ANDECHA ASTUR, DARREU, LOCAL CAMBALACHE, PICU RABICU, FUSOA, L'ARCU LA VIEYA, SOFITU, COORDINADORA ANTIFACISTA D'ASTURIES Y EL GRUPU D'APOYU A INICIATIVA INTERNACIONALISTA-LA SOLIDARIDÁ ENTE LOS PUEBLOS , denunciando la situación predemocratica que sofrimos los ciudadanos d'esti estáu.



Textu de la rueda prensa:
Buenes tardes a toes y gracies por acudir a esta rueda de prensa que va consistir na llectura d’un comunicáu de denuncia de la Llei de Partíos, apoyáu por distintos colectivos y organizaciones sociales asturianes.

La sentencia del Tribunal Constitucional qu’anula la illegalización de la llista d’Iniciativa Internacionalista a les elecciones europees ye, ensin dulda nenguna, una buena noticia. A lo menos pa les persones que venimos esmoleciéndonos al ver cómo, nel nome de la llucha contra’l terrorismu, la Llei de Partíos da en ser ferramienta de represión de llibertá ideolóxica, pluralismu políticu y otros principios básicos más contemplaos nun Estáu de derechu. Agora’l peligru ye que los argumentos del TC busquen convertise n’espresión d’un nuevo sentíu común onde la Llei de Partíos “correctamente interpretada apaeza como un horizonte incuestionable que nun se pue perpasar”.

De magar la so promulgación en xunu del 2002, esta Llei -que se presentó como una norma astracta y xeneral, aplicable a cualesquier partíu- descubrióse desiguida como un instrumentu efectivu usáu por PSOE y PP (col silenciu o la complicidá de los más de los partíos) pa facer callar cualesquier opción electoral de partíos políticos venceyaos de dalguna manera a la izquierda abertzale. L’intentu d’illegalización d’II supunxo la primer vez l’usu de la Llei de Partíos fuera del ámbitu específicu d’Euskal Herria, yá que s’aplicaba a una coalición electoral ensin candidatos vascos y promovida por dos partíos d’ámbitu castellanu, que la so llegalidá naide nun cuestionaba.

Les iniciatives xurídiques desarrollaes al amparu del PSOE y el PP, y que tienen al ministru Rubalcaba como impulsor principal, manifiesten el tresfondu partidista d’ésta y otres lleis, mesmo que la nula división ente los poderes político y xudicial.

Del testu constitucional deduzse a les clares que l’únicu límite que la Constitución impón al derechu d’asociación ye’l penal, ello ye, pa esti casu, qu’un partíu políticu busque fines o use medios delictivos. La Llei de Partíos s’extralimita, poro, del ámbitu constitucional; la indeterminación cola que defín lo que son conductes ilícites promueve pa detrás l’arbitrariedá na so aplicación. D’esta manera, cola conocida teoría del entornu criminalízase de manera sistemática cualesquier iniciativa, yá sía dende los movimientos sociales como ye’l casu de les procesaes nel macrosumariu 18/98; o dende los partíos políticos. Asina les coses, listes “contaminaes” por candidatos más menos rellacionaos col “entornu abertzale” contaminen a otres listes (non sólo n’Euskadi, tamién n’Asturies) que al empar contaminaben a otres y asina nuna socesión imparable d’illegalizaciones que son consecuencia de decisiones polítiques que busquen impedir la participación de quien ocupen un determináu espaciu ideolóxicu.

Poro, les organizaciones presentes queremos denunciar la Llei de Partíos y esixir la so derogación, yá que se caracteriza por atacar y restrinxir los derechos básicos d’asociación, participación y espresión.

RUEDA DE PRENSA ESCONTRA LA LLEI DE PARTÍOS
















BABERU ESCONTRA LA LLEI DE PARTÍOS

VIDIO ELLEUTORAL N'ASTURIANU

ROSA DIEZ PIDE NUN VOTAR A I.I.

facista nun ye namai él qu'alza'l brazu

La candidatur cosmica

SOFITU (M.A.P.) ÉNTE L'ANULACIÓN DE LA CANDIDATURA D'I.I.

COMUNICÁU II

La organización antirepresiva Sofitu manifiesta la so refuga fonda pola anulación de la candidatura INICIATIVA INTERNACIONALISTA-LA SOLIDARIEDÁ ENTE LOS PUEBLOS pa les próximes elecciones europees, al empar que denuncia’l calter facista del estáu español qu’otra vuelta vulnera los derechos civiles y políticos que diz regular na so constitución. Esti estáu español qu’una vez más asitíase nos sos oríxenes y torna pa la dómina dorada del réxime del facista Franco. Sofitu quier alertar del instrumentu ad hoc aprobáu nel 2002, que se redacta na famosa “llei de partíos”, dende’l que se desarrollen esta mena de “llimpieces de la disidencia política”; una llei que por estensión nun actúa contra les organizaciones polítiques asitiaes na estrema derecha oficial que valen p’afitar el réxime facista español, a pesar de la so connivencia col terrorismu y la vulneración de los derechos más elementales contra distintos colectivos esistentes na sociedá, y que tampoco nun actúa contra la entente tamién asitiada na estrema derecha española (nesta ocasión, con calter non oficial) PSOE-PP, con conocíos pasaos y presentes venceyaos de manera directa na guerra puerco (Euskal Herria, Irak, Afganistán…), y que con rigor y de manera eshaustiva n’aplicación de la Llei 6/2002, de 27 de xunu LLEI ORGÁNICA DE PARTÍOS POLÍTICOS diben tar darréu fuera de la “so” llei española. Sía que fuere, llei tala, igual que’l restu del ordenamientu xurídicu español, ye un instrumentu estranxeru pal nuestru país, un instrumentu de dominación y contra’l que facemos un llamáu a rebelase al conxuntu del pueblu asturianu.
Acordies col so calter facista, el réxime políticu que nesta etapa histórica atiñaznos como pueblu, nun tien elementu nengún que lu defina como réxime democráticu. Sofitu nun espera nada nin de nenguna instancia nin de nengún órganu del estáu, nin del recursu del Tribunal Constitucional español mesmo que tampoco nun lo espera del Tribunal Supremo español, polo que consideramos que nun esiste nengún tipu de división de poderes, que nel so ámbitu esisten poderes escuros y fácticos qu’en realidá son los que tienen el poder políticu sobre los que xiren esta clase de decisiones ensin nengún tipu d’aval de xusticia. Les lleis españoles namás valen pa da-y dalgún tipu de revistimientu formal que d’otra banda cada vuelta cuiden menos, sabedores que yá se-yos “cai la mázcara”. Los facistes españoles actúen directo, y d’esta manera la primer vez, contra sensibilidaes polítiques d’otros pueblos que nun son el vascu y que, poro, suponen un nuevu saltu cualitativu na so estratexa aniquiladora nos deseos de llibertá de los pueblos a los que soxulga y les clases trabayadores a les qu’esplota.
A lo último, Sofitu fai un llamáu al pueblu asturianu al envís de que participe na movilización que se desarrollen nes próximes selmanes nel nuestru país, a la contra d’esti nuevu atentáu fechu pol facismu españo asitiáu nos poderes políticos españoles.
¡PUXA ASTURIES LLIBRE!
¡INDEPENDENCIA Y SOCIALISMU!
¡PUXA LA LLUCHA!