Comunicau énte la criminalización d'I.I.

Asistimos nestos díes a una xabaz campaña d’intoxicación informativa cola fin de criminalizar a la Candidatura al Parlamentu Europeu Iniciativa Internacionalista - La Solidaridá ente los pueblos pa poder xustificar darréu cualquier intentu d’illegalización.

Ocurre lo que abarruntabamos nun Estáu, nel que la mayoría de les sos instituciones seríen incapaces de superar el mas cenciellu exame democráticu y nel qu’una bona parte de los sos medios de comunicación, nos mas de los casos aureadores del guelpe d’Estau militar-facista del 18 de Xunetu de 1.936 (ABC, Norte de Castilla…), fuxen de cualquier criteriu profesional o éticu, teniendo como únicu oxetivu la manipulación mediático pa garantír la reproducción del actual réxime .

El vienres pasáu, la vicepresidenta del Gobiernu Español informaba de que se dieron instrucciones a l’Abogacía del Estau con tal envís, pese de que los informes de la Guardia Civil, Policia Nacional y Fiscalía del Tribunal Supremu escartaben cualquier motivu pa la illegalización de la nuesa candidatura.

Iniciativa Internacionalista-La Solidaridá ente los Pueblos ye la espresión d’un procesu de confluencia de fuercies polítiques y sociales asina como de persones a títulu individual d’estremáos ámbetos territoriales y sectoriales que nun resultaria cenciello de materializar hai unos meses.

La situación d’extraordinaria emerxencia pola que tan pasando los nuesos respeutivos pueblos y clases trabayadores, asina como la concencia de quienes afalamos I.I. de la gravedá de la situación: paru qu’aportara nel conxuntu del Estáu a los cinco millones de trabayadores enantes de que fine l’añu, zarru d’empreses ensín xustificación, espilfarru del dineru públicu pa siguir sovencionando a los culpables de la crisis como’l sector financieru ya inmobiliariu, corrupción xeneralizao, involución de los drechos políticos, civiles y sociales, contrarreformes llaborales…..fae mas precisu atropar esfuerzos pa construyir ente toos y toes una xida a la crisis afitada’n criterios de democracia y xusticia social. Eso ye lo que fizo posible el surdimientu d’Iniciativa Internacionalista y non la falacia d’instrumentalización dala por parte de naide.

La cosa ye qu’esta iniciativa política garro dafechu a contrapelo al réxime actual que nun esperaba. Antañu y dada la gran acoyida que ta algamando ente les xentes d’estremaos pueblos, entamo a preocupa-yos mui seriamente, porque arriendes de la importante repercusión político que esta iniciativa ya ta teniendo, puede algamase representación nel Parlamentu Europeu. Tala cosa supón que la voz de los y les trabayadores y los pueblos taría ellí representao d’una forma coherente y ensín falcatúes. Esi ye l’auténticu problema de fondu.

P.P., PSOE ya I.X, punxeronse n’ello pa torgar que tala cosa asoceda y entamaron, xunta colos medios de comunicación más reaccionarios, una cruzada pa que los cargos públicos retiren los sos avales a la candidatura. Esto ficieronlo d’una forma fraudulenta. Con presiones intolerables, engaños ya inclusive creyemos que con falsificación documental.

De nada va servi-yos porque, amás de la duldosa viabilidá d’esta cuestión, hai avales suficientes pa caltener la candidatura anque se materializaren delles d’eses retiraes.
En cualquier casu, esti escenariu que ya abarruntabamos, val pa retratar dafechu la identidá de fondu ente los tres partíos españoles pegoyos del actual réxime monárquicu: PP, PSOE ya IU, conxuraos pa intentar torgar cualquier avance progresista.

Iniciativa Internacionalista - La Solidaridá ente los Pueblos va siguir p’alantre cola so actividá política. Nos prósimos díes tan previstos actos de presentación de la candidatura na Universidá Complutense de Madrí, Zaragoza , Segovia, Valencia y Sevilla.

I.I. va tar presente, por muncho que-yos duela a dalgunos, nes elleiciones del día 7 de Xunu ya I.I. va algamar unos resultáos políticamente persignificativos y probatiblemente representación parlamentaria.
Les técniques de manual qu’usa el Señor Rubalcaba, antiguu ministru de los Gobiernos que prauticaron terrorismu d’Estau, colos sos compinches del más ranciu facismu español, de criminalizar, intentar aisllar socialmente y reprimir, nun-y van valer nesta ocasión.

Les xentes que sofitamos esti ilusionante proyeutu énte esa llinea de trabayu del Estáu y del so ministru l’interior, cenciellamente ufremos coherencia democrático y compromisu cola xusticia social, asina como llevamos faciendolo demientrs d’estos años nos nuesos respeutivos pueblos.

10 de Mayu de 2009

MANIFIESTU

Tamos asistiendo a la mayor crisis del capitalismu nos caberos ochenta años, y otra vuelta los gobiernos de la Xunión Europea quieren que paguen les sos consecuencies los trabayadores y los sectores populares. En toa Europa, los despidos, los espedientes de regulación d'emplegu y la non renovación de contratos tan tornándose cada día nel drama de millones de persones condergaes al paru, al desahuciu y a la miseria.

Los gobiernos europeos arrampuñen l'erariu públicu p'arrescatar a los banqueros y sofitar a les grandes empreses, demientres el desemplegu medra ensin aparar. Ye la Europa de les privatizaciones, del Plan Boloña pa mercantilizar l'enseñu superior, de la Direutiva Bolkenstein o de la Direutiva del Retornu escontra de los trabayadores inmigrantes, que-y da aliendu a la xenofobia y al racismu.

La crisis d'anguaño, como nun podía ser d'otra miente, amás de les sos consecuencies económiques y sociales, ta faciendo espoxigar tresformaciones polítiques mui importantes, que van ser más fondes nun futuru próximu.

Nel casu del Estáu español, la crisis, la global y la propia, tan contribuyendo a dexar definitivamente albentestate los desdexos del Gobiernu de Rodríguez Zapatero y del réxime borbónicu surdíu del nomáu procesu de "transición": corrupción xeneralizao, usu de la represión llegal o illegal como manera emplegada pa facer davezu frente a los conflictos sociales y políticos colos sectores populares, precariedá de los servicios sociales, colapsu de los sistemes educativos...

De mou mui especial, remanecen les pergraves torgues democrátiques d'un réxime nel que'l Xefe d'Estáu, Juan Carlos I, foi impuestu por Franco, réxime que, acordies con esta situación llaceriosa, ye incapaz d'ellaborar una llei de la memoria histórica que reconoza la realidá de la resistencia antifascista de los nuesos pueblos.


Esiste una corriente involucionista, neofascista, entamada por sectores poderosos del capitalismu español y la so rede institucional y mediática, que tien dos cares: la "moderna", de la que ye la espresión más significativa la UpyD, y la "tradicional", que tien como punta de llanza a la Conferencia Episcopal Española. Esta corriente involucionista, coles sos estremaes espresiones, ye la que nesti intre ta orientando la estratexa de fondu del bloque dominante español, incluyíu'l Gobiernu del Estáu. Una estratexa que se materializa, ente otres coses, na xuntanza PP-PSOE p'algamar el gobiernu vascongáu con un oxetivu claru: la españolización d'esi territoriu.

Del otru llau tamos les fuercies soberanistes ya independentistes d'esquierdes, les fuercies polítiques de la esquierda estatal respetuoses colos derechos nacionales de los dixebraos pueblos oprimíos pol Estáu español, asina como importantes movimientos sociales y sindicales, ente los que destaquen el movimientu antifascista; el movimientu escontra la privatización de la sanidá, la educación y los servicios públicos; les lluches obreres escontra los EREs y despidos; la llucha de los estudiantes escontra'l Plan Boloña; los movimientos de muyeres...Al tiempu, dalgunos d'estos movimientos sociales tienen una importante articulación nacional-popular, de manera más fonda nos pueblos nos que'l procesu políticu soberanista ta más avanzáu.

Abúltanos qu'esiste capacidá a esgaya como pa orientar con un sentir anticapitalista y democráticu esi deséu, cada vuelta más espardíu, de cambéu radical, anque anguaño esta capacidá tenga un desendolcu desigual nes nuestres respeutives naciones.

Entamando con esta valoración, impulsamos esti manifitestu, que tien les siguientes exes básiques:

* Xusticia social. Que la crisis la paguen quienes la provocaron: los capitalistes. El capitalismu español tien unes carauterístiques especialmente agresives, como la fonda precariedá llaboral, causa de la mayor tasa de paru y d'emplegu eventual de la X.E. Y agora l'enfotu del sistema ye dar una vuelta de tuerca más no que cinca a la esplotación y a los recortes sociales. La xente que sofitamos esti manifiestu garramos el compromisu de puxar pola movilización pa parar estos despropósitos, desixendo un plan de rescate de los trabayadores, ensin medrana a proponer pa ello midíes anticapitalistes.

* Llibertaes democrátiques plenes. Tamos comprobando cómo, pasu ente pasu, van recortándose, inda más, los llimitaos derechos civiles esistentes, como'l derechu a la non discriminación por razones ideolóxiques, de llingua y cultura, d'edá o de xéneru. El derechu a la llibre espresión, el derechu a nun ser represaliáu, torturáu o procesáu poles idées propies. El derechu a votar y ser votáu. L'Estáu español nun respeta la soberanía de les estremaes naciones que caltién na so xurisdicción nin del conxuntu de pueblos. Esiste un entramáu xurídico-políticu creáu na transición que tornó al Estáu nuna cárcele de pueblos y xentes, asina como nun pozu de corrupción.

* Non a la discriminación de xéneru. Pero non como un enunciáu formal y vaciu de conteníu, sinon como una desixencia normativa, xurídica y práutica que faiga posible'l fin de la discriminación. Esto inclúi, ente otres coses, el derechu y la posibilidá real de control de les muyeres sobre'l so propiu cuerpu, la so sexualidá y la so capacidá reproductiva.

* Derechos políticos. Reivindicamos los derechos negaos pol réxime d'anguaño, ente los qu'hai que sorrayar el derechu de tolos pueblos a decidir de mou soberanu'l so futuru, y non como un fechu aislláu, sinon como un derechu permanente, ye dicir, el derechu d'autodeterminación. El derechu de cada pueblu a decidir la so forma de gobiernu y a la normalización de la so llingua y cultura nacionales.

* Escontra la Europa del capital. Tamos a la escontra de la Europa del capital y a favor de la Europa de los pueblos. Tamos a la escontra de la OTAN como espresión militar del imperialismu, poro, desiximos la retirada del Estáu español d'esta alianza militar. Tamos a la escontra de la especulación y l'esfarrape del mediu ambiente. Tamos pola defensa de la soberanía alimentaria y de lo coleutivo ente lo privao.


Sofitamos los procesos soberanistes que s'entamen a nivel européu, y, al tiempu, espresamos la nuesa solidariedá pa colos procesos d'articulación patrióticos, antiimperialistes y de xusticia social que se tan desendolcando en Llatinoamérica, asina como pa colos frentes de resistencia n'Oriente Mediu, y de manera mui especial, cola heroica llucha del pueblu Palestín. Dende una fonda vocación internacionalista, sofitamos les lluches de tolos pueblos del mundu pola so llibertá y la so dignidá.

Comisión promotora de la candidatura a Parlamentu Européu "Iniciativa Internacionalista"

15 d'abril de 2009